|
| 好耐冇遊過船河，出發的前一晚，三號風球仍掛著... 擔心就算下了風球，都會落大雨~~
呢次遊船河，book了隻大遊艇，十分闊落，船駛到海中心，風平浪靜，仲好鬼猛太陽，要搽番d太陽油lor~
由香港仔出發去西貢，需時三個鐘頭，係船頂玩了個零鐘，就要匿番埋下層抖抖~ 唔係未玩，就曬傷晒!
未到西貢，遠處已經見到好多貴族帆船啟程，再近d，有好多wakeboard友、香蕉船，真係好氣氛，未落水先興奮呀~ 到了一個灣，太多遊艇了~ 再找過另一個灣，可使遊艇泊近d沙灘~
泊定後，就鬥快浸落水，天氣實在太熱了! 玩下水、對下啤、又玩下水，就出發上西貢碼頭食海鮮啊!
幫襯最大果間洪記，揀最靚的海鮮，有大瀨尿蝦、大蟶子、象拔蚝刺身，蒸了一條4斤幾重既藍瓜子斑... 仲要刀叉享受南非鮮鮑，食得十分豪氣，食得咁"大"，埋單當然"大"獲啦... 人均消費5舊水~ 做左一條大水魚比人劏啊~
食到尾段，已經好眼訓、好攰... 加上手較超痛，可能遊水前冇熱身，跳水chok親... 帶住超疲勞的身驅回程番香港仔~~
番到屋企大堂，受鄰居歧視... 因為我地裝束是波褲拖鞋，一大袋二大袋，全身通紅，加上一臉殘樣，比人感覺十分古怪... 去一次遊船河，真是又出錢、又出命... | | |
| 今日喺我加入馮民彥嘅攝影團的大日子。 第一站去咗我們的老地方附近的橋上,練習吓常用的AV及TV modes,雖然聽過佢講解,但以我嘅解釋,AV將光圈調大後,對住d好近嘅嘢影,focus以外的就會濛,目的係要要影濛幅相...kaka!! TV將快門調細,就影到好快嘅動作,調大就會影到d怪線條,而且好易手震。 開始乜都影,廣告牌又影,車又影,鬼妹又影!今日落大雨,d相都係灰灰的... 整日就不斷避雨,期望下次出團可以影得靚D! | | |
| 時間過得真快,09又行咗一半... 每年工廠喺呢個月,都要再申請新合同,主要係申報來年材料的用量及出口的產量。為咗交少一點保証金,要縮少已經很少的投資額... 唔知下年度,會接到什麼有意思的工程項目做呢?
上一年,我主要管住進料的quota,出貨的報關工作,好像成年都冇開過AutoCAD畫圖,偏離咗要做一個Engineer,感覺對公司冇乜建樹,總是計算不到自己有幾多價值!
近來,經常想掉低工作不理,對呢一年的工作表現不太滿意,係時侯,要想想...再為自己制定一份新合同了... | | |
| 下午,趕住入南丫島交d嘢比人,收到對方電話,三號風球地盤會早放工,由北面嘅大陸出發,要駁上的士、火車、地鐵,再坐埋船,先至入到南面既南丫島... 行到隻腳都哽晒,總算趕得上放工前到,跟他們一起坐收工船番中環。 放工唔想番屋企,坐巴士過灣仔搵娜娜,點知佢想去中環,於是坐叮叮返回中環... 有娜娜喺身邊真輕鬆,咩都唔使諗,佢就會自然帶我去東去西,飲吓嘢、睇吓嘢、再飲吓嘢後,就搵d嘢食吓,見佢仲好精靈,再去LKF飲嘢,只要佢d寄託冇晒,就可以好易約到娜娜啦! 不過,都希望佢同西瓜可以搵到正常嘅寄託! | | |
| 今個星期日係Father's Day，不過我下晝有個exam，都冇陪佢去飲茶! 考2點鐘，諗住1點出門口都冇問題，有成個鐘實出到MK啦~ 架巴士都幾滿，走左上上層坐，一開車，車尾傳來一點怪聲... 原來有個肥佬係度打鼻鼾... 點知愈來愈大聲，人人都忍不住望佢一眼...勁熟睡! 足足比佢嘈左成半個鐘... 死啦! 原來塞左車咁耐啦? 仲有15分鐘就開考，仲差一個站先埋站... 好心急咁企係中門等落車，點知個巴士佬大聲問"係唔係有人落車呀?" 心諗:"佢做咩咁問?" 原來我地冇人按過鐘，哈哈! 落車仲要行一大段路... 去到試場遲左5分鐘，好彩都仲係閱卷時間! 今日係open book，大家2個鐘就係度不斷咁揭書啦! 算啦~ 有得抄下書，應該唔會0分既!! 考完試，例牌同d同學仔出外呼吸"新鮮"空氣及閒談一番! 都企左係街成廿分鐘~ ByeBye後，就出香港仔酒樓join番屋企人，諗住乘"坐"970X唔使轉車啦~ 點知"企"足全程，乜今日條街咁多人架? 差唔多去到瑪麗，先搵到位坐! 去到酒樓，就帶Michael仔落街行下，買左本足球雜誌佢睇(自己細個時都唔會睇呢d書)，買左杯Apollo就上番酒樓hea了... 我阿嬸仲未等得齊腳，叫左佢老公、我大家姐同我去開台，都好耐冇同佢地打過麻雀了，一開波就狂出沖，又要打逆境波... 終於去到西圈，我林左5次莊，威番一輪，回番差唔多一半... 點知我又要出沖一手清一色去結束我個莊，比我阿叔笑我贏埋都唔夠輸，哈哈! D腳開始埋位啦，阿叔->另一個阿嬸，第一個感覺是"三娘教子?" 哈哈!! 明顯，我既勢頭更弱，其實d牌超靚架，不過，次次一叫糊，一博牌就出沖! 5嬸都來了，諗住讓佢打退出這是非之地啦! 佢叫我打住先啦! 我首牌都幾順，好快又叫糊... 點知，上家清一色面，竟然單吊白板，而佢隻白板，我仲曾經摸過上手，就係咁比人KO左，清埋d數，就走去d兄弟吹水算了... 我要決心歸隱雀壇!!! | | |
|
